التزوير من أختصاص الدفاس

حد شاف فيلم ناصر 56 .. لما عبد الناصر كان قاعد فى جنينه الفيلا عشان عيد ميلاد أبنه و فجائه حصلت غاره جويه فوق بيته .. راح طلع فوق سطح الفيلا و قال قاذفات بعيده المدى , بريطانيا دخلت الحرب .. أيه ده يا خونا .. أدى الزعيم ولا بلاش ,الراجل من بصه واحده اى والله من بصه واحده عرف أن بريطانيا دخلت الحرب .. ولا و هو طالع سطح الفيلا و الحرس عمال يقوله بلاش يا ريس تطلع فيها خطوره على حياتك .. أصر عبد الناصر أنه يطلع و مهمهوش, يعنى منزلش تحت الكرسى زى صاحبنا فى لحظه أغتيال السادات الله يرحمه
أما لو صاحبنا بقى ألى هو مبارك كان مكانه .. كان حجز طياره خاصه للمدام و للأولاد عشان يهربهم على سويسرا و بعدين طلع يجرى على القصر .. فالحرس يقوله لا يا ريس متطلعش فوق السطح عشان فيه خطوره على حياتك .. يقوم صاحبنا قايل فوق السطح مين يبنى حد يقولى المخبأ المضاد للقنابل النوويه فين .. يروح نازل المخبأ ألى تحت الأرض أصل الناس دى عندهم مخابئ تحت الأرض فيها بقى مولات و كل حاجه يدوا ميسد و هما فى الطياره يتفتحلهم المخبأ .. هما يعيشوا تحت الأرض و أحنا نعيش فوق نسف التراب
ما علينا نرجع لموضوعنا .. فيقوم صاحبنا نازل المخبأ و يشوف عن طريق الشاشه طياره مرسوم عليها علم بريطانيا يقوم لابس النضاره عشان يتأكد أن العلم لونه أزرق و فيه خطوط حمرا بالطول و العرض .. و بعد ما يتأكد يقلع النضاره و يقول بكل ذكاء و دهاء طيارات عليها علم بريطانيا .. يبقى بريطانيا -أحتمال- تكون دخلت الحرب
و تانى يوم بقى فى الجرايد يقولوا أن الريس من نظره واحده عرف ان بريطانيا دخلت الحرب و تقوم تطلع أشاعه أن صاحبنا ذكى أى والله ذكى
مش عايز واحد ذكى زى صاحبنا كده بالظبط يقولى ايه لازمه الكلام ده كله ؟؟ عشان واضح جداً أنى عايز أوضح الفرق بين عبد الناصر و صاحبنا .. بين واحد الناس كلها بتقوله يا زعيم و واحد يوم ما يحبوا يوجبوا معاه يقولوله يا ريس زى أى سواق ميكروباس محترم
واللهى صاحبنا ده عار علينا
عااااااااااااااااااار
طب خدوا دى .. تخيل أنت بتتصل بالبت بتاعتك قمت ضربت النمره غلط .. راح رد عليك واحد فبتقول ايه ده يا سميحه صوتك طخين كده ليه هو أنا مش قولتلك متاكليش محشى عشان متبوزيش الدايت
يقوم الراجل قايل أنا مش سميحه يا أبنى أنا حسنى مبارك .. فتروح قايله حسنى مبارك مين .. أنت هتهرج معايا بروح أمك .. تك
لأنك طبعاً مش هتعمل زى فيلم ناصر 56 و تنزل منك دمعتين و تقوله ربنا يوفقك
ده على أفتراض طبعاً أنك صدقت أن حسنى مبارك عنده خط موبينيل و ممكن تتصل بيه عادى كده من غير خمسين سيكرتير ما يحولك عليه و من غير ما يكشفوا على الخط بتاعك .. جايز يطلع خط مفخخ ولا حاجه
مش بقولكم صاحبنا ده عااااااااااار علينا
طب خدوا دى كمان .. شوفتم فى نهايه نفس الفيلم عبد الناصر لما قام فى الجامع و خطب فى الناس .. و شوفتم صاحبنا لما تسمح الظروف يعنى و يصلى صلاه الجمعه مع أنها معدتش تحصل الا نادراً و يجبوه من مسجد شرم الشيخ و هو قاعد فى الصف الأول نايم وبيلعب فى صوابع رجليه و وراه كل المصليين أمن دوله .. أى والله أمن دوله .. كل المصليين وراه بيبصوا حواليهم فى قلق أمنى و ماسكين جرانيل مخرومه و حاطيين سماعات بلوتوز فى ودانهم أى والله بلوتوز
و لما تخلص الصلاه يتحول المسجد ثكنه عسكريه من كتر الحراسات
عااااار واللهى عار .. بالنسبه لكلمه عار ألى عمال أقولها دى .. حد فيكم شاف فيلم العار بتاع محمود عبد العزيز و حسين فهمى و نور الشريف
أنا بقى نفسى يحصل فى عائله مبارك نفس ألى حصل فى الفيلم
يقوم فى الأنتخابات الجايه مبارك يأمر رجال التزوير فى الحزب الوطنى يروحوا يفيشو الهوامش أو يزوروا الأنتخابات يعنى .. و يقوم الميكروباص يتقلب برجال الحزب الوطنى و هما رايحيين صناديق الأنتخابات و يولعوا و يروحوا جهنم و بئس المصير
و يجى يوم الفرز .. و يوم فرز الأنتخابات يكرم المرء أو يهان .. و تطلع النتيجه أن الشعب أختار زكريا الجريرى رئيس حزب لا للكوسه و نعم للجرجير
فحسنى مبارك يعمل زى نور الشريف يقعد يدلق صناديق الأنتخابات و يعوم وسط كروت الأنتخابات و كل ما يقلب كارت يلاقى مكتوب فيه زكريا الجرجيرى .. و يقعد يصرخ و هو وسط كروت الأنتخابات
شقى عمررررررررررى .. شقى عمررررررررى
يقوم واحد من الشعب يقول زى الفيلم كده بالظبط لا حول ولا قوه الا بالله بقى المعلم مبارك ميعرفش أزاى يزور الأنتخابات
يقوم مبارك قايله التزوير كان من أختصاص الدفاس ألى أتقلب بيه الميكرباس
يقوم جمال مبارك عامل زى محمود عبد العزيز بقى و يقول يعنى ايه ؟ كله راح ؟ نياهاهاهاهاهاه .. الملاحه الملاحه و حبيبتى ملو الطراحه .. و يا حبه عين أمه يتجنن
و علاء مبارك يطلع المسدس زى حسين فهمى و يطخ نفسه بالنار و نخلص
هو ده العار ألى على حق و حقيق

الله .. الوطن .. الدفاس ألى أتقلب بيه الميكرباس