الريس و شركاه

ملحوظه : أى تشابه بين شخصيات هذه القصه و شخصيات واقعيه فهو من باب التعمد مش الصدفه .. فى مانع؟

***

الدبابات الأسرائيليه تجتاح قطاع غزه
الطائرات تقصف المنازل الفلسطينيه
مجازر على الأراضى المحتله
مصرع فلسطينى و أصابه ثلاثه فى غاره جديده
أيووووووووووه..أجفل التلفزيون يا عب ربو .. بلا وجع جلب
قالها المعلم بسيونى صاحب كشك السجائر, للواد الصغير ألى شغال عنده
فقال له عبد ربه
أجيب جناه الأغانى
يا واد بلا وجع دماغ..يبجى اخوانا فى فلسطين بينضربوا و احنا نسمع اغانى
أمال أجيب جناه ايه..ما نسمع غنيوه صغيره يا معلمى و نفكها شويه..الليل طويل
صرخ المعلم
أجفل التلفزيون خالص يا (عب ربو) أنا مالياش نفس واصل
قفل عبد ربه التلفزيون , و هو بيقول
حاضر يا معلمى..هدى أعصابك
أصل اليهود مش هيجيبوها لبر يا عب ربو..و مصر مش بتعمل حاجه واصل

***

ألوووو .. معاليك كله تمام .. والله ما أنت جاى ..طبعاً معاليك ..هيع هيع ..خيرك مغرقنا ..ايوه 6 مليار ..هيع هيع ..رضاك عنا يا كبير ..طبعاً يا ريس ده انا وزيرك المخلص
خلص الوزير التليفون بشويه كلمات تعظيم و تفخيم و بعدها دخلت السكيرتيره الفاتنه , و هى بتقول
رجل الأعمال (عزوز) و ابن الريس
نط الوزير من مكانه ..و هو بيقول
دخليهم حالاً
فدخلوا و هو يقول بأبتسامه عريضه
عزوووووووووز باشا و ابن الريس فى مكتبى .. أتفضلوا يا رجاله
قعد عزوز و على وجهه أبتسامه سمجه معروف بيها .. و ابن الريس بيقول
فيه أى مشاكل؟
لا أطلاقا ً.. كله تحت السيطر ه .. ده أنا لسه سايب الريس دلوقتى
سايبه ايه؟؟ بابا فى شرم الشيخ من اول السنه .. هو جه القاهره؟ غريبه اول مره يعملها
هيع هيع ..لا مجاش ده كان بيكلمنى ع التلافون
هنا قال عزوز بنفس الأبتسامه و هو بيلزق خصله شعره فى مكانها
قاصدينك فى خدمه
ضرب الوزير قفاه و هو بيقول
سداد يا رجاله .. أنتوا تؤمرونى .. هو أنا عندى أغلى من (عزوز) و ابن الريس
طبطب ابن الريس على كتف عزوز, و هو بيقول
بابا بيعتبره واحد من ولاده
ضحك الوزير , و هو بيقول
هيع هيع .. طبعاً ده عشان أغنى رجل أعمال فى
سكت الوزير مره واحده لما لقى ان العباره خاليه من الذوق , فعتم على الموضوع و هو بيقول
هه؟؟ رقبتى سداده يا رجاله
عدى ابن الريس الموضوع بمزاجه , و هو بيقول
منطقه (درب السهتان) منطقه عشوائيه ملهاش اى لازمه بيسكنها شويه ناس غلابه .. و ألى غايظنى أنها فى منطقه حيويه فى القاهره و حواليها مناطق كلها راقيه
ولع الوزير سيجارته و هو بيقول
هيع هيع .. اه (درب السهتان) منطقه قديمه فعلاً و أنتوا عارفين ان القاهره مكنتش بالكبر ده زمان و بدأت تتوسع.. و دى زمان بنوها عشوائياً و مكنش فيها لا ميه ولا نور سنين طويله و بعد توسع القاهره بقت منطقه حيويه و كل المناطق ألى حواليها راقيه جداً جداً فعلاً .. بس هنعمل ايه بقى
ابتسم عزوز نفس الأبتسامه السمجه , و قال
ليه منهدهاش ..أحنا جالنا عرض رهيب فعلاً من شركه أمريكيه مشهوره و غنيه جداً عايزه تشترى جزء كبير من المنطقه دى عشان تبنى عليه مشروع تجارى ضخم جداً
قال الوزير فى دهشه
نهدها أزاى؟؟ و الناس ألى ساكنه فيها
قال ابن الريس
ايه ده؟؟ ما انا لسه قايلك ساكنها ناس غلابه جداً يا عزيزى يعنى ممكن نوفرلهم سكن أفضل بسهوله ..طب أنت فاكر الزلزال بتاع أمبارح؟؟ ممكن نقول أن مركزه كان منطقه درب السهتان و نقول كمان أنه أثر بشكل سلبى جدا على المساكن و خصوصاً أن كلها قديمه جدا و حاجه أنتيكه خالص
كمل عزوز كلام صديقه
و تصدر سعادتك أمر أزاله للجزء ألى عايزينه من المنطقه دى و نعمل للسكان معسكرات من الخيم يقعدوا فيها زى ما القانون بيقول .. لحد ما تدبرلهم سعادتك مساكن جديده
قال الوزير , فى قلق
بس الصحافه مش هترحمنا
ضحك عزوز , قبل ان يقول
ده لمصلحه الناس يا باشا و أنت أدرى أكيد..الزلزال هو السبب
نقر الوزير بأصبعه على سطح المكتب مفكراً, قبل ان يقول
طب و بعد ده كله ايه هيحصل
قال ابن الريس , فى حماسه
طبعا نشترى انا و (عزوز) الأرض دى بسعر مناسب و بعد كده نبيعها للشركه الأمريكيه بأسعار فلكيه زى ما أتفقنا معاهم لأنها منطقه حيويه جداً و المكسب هنا هيبقى بالملايين يا عزيزى
قال الوزير, و هو يشير ألى صوره خلف مكتبه
طب معاليه يعرف
قال ابن الريس
أنا مش بخبى حاجه على بابا و أنت عارف كده .. فى المواضيع دى بالذات بابا رأيه بيهمنى جداً
أبتسم (عزوز) , و هو يقول
عشرين مليون فى حسابك بسويسرا .. ايه رأيك
فرك الوزير يداه فى جشع , و هو يقول
على بركه الله .. نقرأ الفاتحه
و بدء الجميع فى قرأه الفاتحه , و قبل أن ينهوها , قال (عزوز) بأبتسامته السمجه لأبن الريس
يدوبك نلحق نمشى

***

كان الريس يرقد على الشيزلونج أمام حمام السباحه بأحد أكبر قصور شرم الشيخ .. قبل ان يطلق تليفونه الخاص نغمه موسيقيه مضحكه , و تحمل شاشته أسم المستشار السياسى
ألو
معاليك بخير
أيوه انا بخير .. ليه بتتصل دلوقتى كنت مستمتع بالغروب
معاليك أحنا لازم نقول كلمه بخصوص المهزله ألى بتحصل فى قطاع غزه
قال الريس
ايه ألى حصل فى قطاع غزه .. ما أحنا مبقاش ورانا سيره غير العراق خلاص
سمع الريس صوت مستشاره السياسى يقول فى حرج
معاليك أكيد تقصد فلسطين
ايه؟ أيوه طبعا .. المهم ايه حصل
معاليك العالم كله مقلوب و انت لسه ... أحم أقصد أن العالم كله مقلوب عشان أسرائيل بدأت تضرب قطاع غزه جامد و العرب مستنيين رد مصر
سعل الريس , فى شده قبل أن يقول
ده تهريج .. ده أسمه تهريج .. أسرائيل بتستهبل .. حقيقى مش هينفع كده .. أحنا لازم نعمل وقفه قويه .. وقفه شديده .. أنا هتصل بالرئيس الأمريكى دلوقتى أتكلم معاه و بفكر نروح المزرعه بتاعته نقعد هناك يومين نشم هوا كويس و بالمره نبقى نتكلم شويه عن القضيه الفلسطينيه
قال المستشار السياسى , فى حرج
ما بلاش معاليك نروح أخر مره كان شكلنا وحش أوى .. الحقيقه مدوناش حقنا خالص و المعامله كانت مهينه
و ايه يعنى أنا من الشعب .. و ياما أتبهدلت و انا صغير .. على العموم مش موضوعنا أسمع الكلام الى هقولك عليه كويس .. أنا هقلب التربيزه فى وش العالم كله أحنا لازم ننقذ أخوانا الفلسطينيين بأى ثمن .. فاهم بأى ثمن
قال المستشار السياسى
اهم حاجه مصالحنا مع امريكا عشان ميقلبوش التربيزه علينا احنا
صمت الريس قليلاً , قبل أن يقول
هقولك هنعمل ايه و أنت أكتب الخطاب بطريقتك الحماسيه المشهوره .. أحنا لازم نضع حد للمهزله دى .. ده تهريج .. أخونا العرب محتاجينا
قول يا ريس .. أشجينى
و بدأ الريس يتكلم فى حماس

***

عشرات الأسر قد تشردت .. سكان (درب السهتان) تشردوا فى مخيمات بسبب الزلزال العنيف الذى أصاب البلاد أول أمس
هكذا قالتها مذيعه التلفزيون المعروفه عبر أحد القنوات الأرضيه
ثم أختفت صورتها ليحل بدلاً منها صوره الوزير صاحب الكرش الضخم , الذى اهتز كالعاده , و هو يقول
نحن نوعد بسكن بديل فوراً فى مناطق أفضل من (درب السهتان) للأسر المتضرره من الزلزال
أختفت صوره الوزير .. قبل أن تظهر المذيعه مجدداً , و هى تقول
و على صعيداً أخر تبرع رجل الأعمال الكبير (عزوز) بمبلغ يرفض ذكره لأهالى المنطقه المنكوبه
و هنا أختفت صوره المذيعه مره أخرى لتظهر صوره لعزوز , و هو يقف وسط الصحفيين قائلاً بحزن عميق
انا اتبرعت لأنى ابن مصر بيصعب عليا الناس الطيبه دى ألى أنا منهم و هما منى
سألته أحد المذيعات سؤالاً قبل أن يجيب
رفضت طبعاً عشان دى حاجه بينى و بين ربنا .. هيهم الناس انها تعرف المبلغ فى ايه .. بس هو مبلغ كبير اوى
و هنا ظهرت المذيعه قائله
فى النهايه لقد أمر السيد الرئيس بأفضل رعايه ممكنه لأهالى المساكن

***

قال الصبى عبد ربه
بتعمل ايه يا معلمى
قال المعلم (بسيونى) صاحب الكشك
أنا لا يمكن أسكت على المهزله دى .. أنا هعلج جماشه على الكشك مكتوب عليها .. لازم نتحرك بجى .. أخوانا بيحاربوا فى شجى
و بالفعل علق المعلم (بسيونى) على كشكه قطعه من القماش الضخمه
مكتوب عليها بخط واضح ضخم لازم نتحرك بقى .. أخوانا بيحاربوا فى شقى و أسفلها مكتوب بخط أصغر .. يلا نحارب يا ريس
و لم يفت سوى يوم واحد حتى كان المعلم (بسيونى) داخل حجره قذره مظلمه .. مقيد على مقعد حديدى و أمامه يقف ضابط ذا رتبه كبيره من مباحث أمن الدوله
أنت تبع أى تنظيم ياد
تنظيم ايه يا باشا
أنت كاتب يلا نحارب يا ريس .. يبقى اخوان مسلمين
لا يا باشا والله ما تبع حد
أنهال الضابط عليه ضرباً باللكمات , قبل أن يقول
أعترف ده لمصلحتك
والله ما تبع أى حاجه .. أنا تبع ربنا
لطمه الضابط , و هو يقول
بقى أنت هتعلم الريس امتى يحارب و أمتى لا
يا باشا ما أنت ميرضكش ألى بيحصل برده فى فلسطين
والله؟؟ عليا النعمه شكلك عميل .. خدوه فسحوه يا رجاله
و بعد يومين من التعذيب الشديد .. و عندما لم يثبت شيئاً ضده ألقوه فى أحد الشوارع عارياً غارقاً فى دمائه

***

الولايات المتحده الأمريكيه .. البيت الأبيض .. المكتب البيضاوى

مستر بريزدنت مالك مضايق كده
قالتها وزيره الخارجيه الأمريكيه
الهومار رئيس المخابرات بيقول أنه جاتله معلومات من أيجيبت أن الرئيس المصرى أنفعل جداً و أمر بالتحرك الحازم و الشديد ضد الهجمات الأسرائيليه
قالت وزيره الخارجيه للرئيس الأمريكى فى قلق
مأظنش يقدر يعمل حاجه .. أحنا نقطع عن ايجيبت المصروف .. البوكيت مانى مستر بريزدنت
مش عارف .. أى دونت نو .. كان بيكلمنى بعصبيه جداً كمان
ضغطت وزيره الخارجيه زر التلفزيون , و هى تقول
خطاب وزير خارجيه مصر بخصوص الهجمات الأسرائيليه
أوكى .. شات أب .. عايز أركز
و فى التلفاز كان يقف رئيس الوزراء طويل القامه , و هو يقول
مصر تندد و تستنشد و تستنكر .. مصر ترفض هذه المهازل .. و حسب توجيهات السيد الرئيس لقد قرر أن يقوم بأجتماع عاجل بشرم الشيخ بين رئيس فلسطين المحتله و بين رئيس وزراء أسرائيل .. و هذا الأجتماع سوف يتوج سلسله الأجتماعات الأخيره .. و لقد قام السيد الرئيس بمكالمه تليفونيه عاجله برئيس دوله (بنما) لبحث الأوضاع فى الأراضى الفلسطينيه
ضحك الرئيس الأمريكى , و هو يقول
الوزير المصرى ده نكته فعلاً .. أنا برده بقول أن جيبى مش مخروم و الكل فى جيبى و محدش هيطلع منه

***

عبرت سياره سوداء تحيطها الحراسه أمام أحد أكشاك السجائر
و من داخل السياره جلس المستشار السياسى للرئيس و هو ينظر الى الكشك فى أعجاب , قائلا للسائق
صاحب الكشك ده وطنى أوى
سعادتك ليه بتقول كده
أصله معلق صوره الريس على الكشك و كاتب عليها .. هشتكنا و بشتكنا يا ريس انت ريس و النعمه كويس
ضحك السائق , و هو يقول
ايوه و كمان كاتب فى يافته كبيره .. أخترناك أخترناك .. يا قائد الدفه فى حكمه وسلام
أبتسم مستشار الرياسه , و هو يقول
راجل محترم
قال السائق
اوى اوى سعادتك .. ده أنا بشترى من عنده سجايرى و اسمه المعلم (بسيونى) .. بس سعادتك بيقولوا أمن الدوله مسكته يومين و من ساعه ما خرج و هو بيغنى كل يوم أدام الكشك أغنيه أخترناك أخترناك
هز المستشار رأسه دلاله على الفهم , و هو يقول
أمن الدوله أصلاح و تربيه و تهذيب
ترررررررررن ترررررررررررن
رد المستشار على تليفونه الخاص فى ذعر , قائلا
معالى الريس .. أيوه خلصت خطاب سعادتك .. والله هتنور القاهره . .والله زمان وحشتنا اوى .. طبعاً أنا فى طريقى للمطار لاستقبال سعادتك .. الخطاب بتاع السنه دى هيعجبك أوى يا ريس و هتقوله من هنا الشعب كله هيبقى عايز ياخدك بالأحضان من هنا

***

وقف الريس أمام الشعب فى خطابه السنوى
الشعب متحمس للسماع
و الريس متلهف لقول الخطاب كى يعود ألى شرم الشيخ
و قبل أن ينظر ألى الورقه ألتى أمامه قال المقدمه ألتى حفظها عن ظهر قلب مع السنين
أيها الأخوه و الأخوات .. يا كل مصرى يستمع لى .. لقد تعودنا معاً أن نتكلم بصراحه فى هذا الخطاب السنوى
أخرج الريس الورقه و وضعها أمامه , ثم تنهد و هو يقرأ منها

***

يادى المصيبه يادى المصيبه
قالها المستشار السياسى , و هو يلطم على وجهه
فهرعت اليه زوجته , و هى تقول
مالك يا راجل
كله بسببك بدل ما ادى للريس ورقه الخطاب أدتله الورقه ألى أنتى بعتهالى .. يادى المصيبه
نظرت زوجته ألى التلفزيون , و هى تقول
يلهوى ده الريس هيبدأ يتكلم
لطم المستشار اكثر و اكثر على وجهه .. فقالت زوجته مهدئه أياه
خلاص بقى ألى حصل حصل .. مش هياخد باله
و الشعب طيب
مش هياخدوا بالهم برده هما معاه كده كده
نظر اليها و قد بدأ فى الهدوء .. ثم عاود النظر ألى شاشه التلفزيون , و الريس يقول بحماس
أتنين علبه زبادى .. و بجنيه فول و بجنيه طعميه .. علبه حلاوه .. و مجله ميكى للواد أبنك
وقف جمهور الشعب فى حماس , و أخذ يهتف
بالروح بالدم نفديك يا ريس
الله يا ريس
الله أكبر يا ريس هو ده الكلام

***

و هكذا خرجت الصحف القوميه فى اليوم التالى تعلن عن دعم الرئيس للفول و الطعميه و مجله ميكى من منطلق حمله القرأه للجميع
و هكذا ذاد رصيد الوزير فى البنك
و (عزوز) و ابن الريس قد باعوا الأرض بعد أن أشتروها ألى الشركه الأمريكيه بمبلغ ضخم
و مازال اهالى (درب السهتان) فى المخيم بعد شهور من الواقعه
و المعلم (بسيونى) ما زال يؤيد الريس قلباً و قالباً
و الريس يدير البلد بحنكه
و الشعب كله يسانده بثقافته السياسيه
و تدور عجله البلد