رساله إلى مصر

السلام عليكم و رحمه الله و بركاته
كامل التحيه و التقدير لأمى و أم الدنيا مصر , أما بعد


صباح الفل يا قمر و يا أرض أتهدى ما عليكى أدى .. أيه يا بت الحلاوه اللى بقيتى فيها دى؟ ما تجيبى بوسه
أمووووووه
فاكره يا حبيبتى لما كنا بننزل مظاهرات زمان و نقعد نهتف و نقول : مصر يا أم ولادك أهم .. دول علشانك شالوا الهم؟
ذكريات زباله أنا عارف
و فكاره لما كنتى تقوليلنا بس يا واد أنتا و هو روحوا بيتكم لحد يعتقلكم ولا يقتلكم .. أنا كويسه متودوش روحكم فى داهيه عشانى

كنا أحياناً بنسمع كلامك و نروح .. و أحياناً بنعاند و نقول أنك بتضحكى علينا عشان خايفه علينا و بنكمل لحد ما يعتقلونا فعلاً و يقتلونا كمان

و فعلاً بتكونى خايفه علينا و بتضحكى علينا عشان تحمينا .. قلب الأم بقى .. بتضحى بنفسك , بأرضك بنيلك بشمسك .. عشان ولادك
بس لا يا أمه .. أنتى مخلفتيش شباب سيس .. أحنا رجاله أوى و لمؤخذه
و أتمنى أنك تكونى مزعلتيش مننا عشان مات من أخواتى اللى هما ولادك حوالى 400 شهيد

بس دول عملوا كده عشانك .. أنا عارف أنك مستعده تضحى بنفسك عشان ميمتوش .. بس لأ يا أمه .. أنتى ضحيتى كتير و أحنا جينا عليكى كتير و أدلعنا عليكى دلع مرئ كتير .. و سيبناكى كتير يا أمنا على ذمة جوز أمنا يتحكم فيكى
جوز أمنا اللى أتجوزك غصب عنك على طريقه العمده فى فيلم الزوجه الثانيه

بس أحنا خلعناه منك .. دلوقتى شوفى بكل ديموقراطيه بتحبى مين و عاوزه تتجوزى مين
و لو معجبكيش فى أى وقت قوليلنا على طول و أحنا نخلعهولك .. خلاص بقى وراكى رجاله
عايز أقولك كمان مبروك .. أنا سمعت أنك حامل فى الشهر التاسع فى عيل أسمه ديموقراطيه .. يتربى فى عزك يختى .. و ساعدى عيلك كده

و والنبى كفايه عياط على ولادك اللى ماتوا .. ده هما دلوقتى عند اللى ذكرك فى القرأن
أخر حاجه عاوز أقولهالك
أنا و أخواتى بجد بنحبك أوى يا أحلى أم فى الدنيا كلها

و من هنا و رايح هنلبسك جديد فى جديد يا مزه
و هتبقى أحلى عروسه فى الدنيا كلها


أبنك البار شريف و أخواته بتوع ميدان التحرير