الكائن التمورى وكيفيه تأثير أسمه على بناء شخصيته

قرأت بحث علمى فى إحدى المجلات العلميه العالميه الشهيره, أن أسم الطفل اللى بيختاره الأب و الأم بيأثر فى تكوين الطفل نفسه يعنى لو أب و أم سموا أبنهم الجعر .. أيه أحتمالات أن الطفل ده يكبر و ميبقاش جعر فعلاً؟ طبعاً أحتمالات ضئيله جداً .. مش مستحيله و إنما ضئيله بما أن لكل قاعده أستثناء و شواذ لأنى هتكلم علمياً بقى بعيداً عن التهريج فمثلاً هنلاقى صفوت الشريف عنده أحساس أنه شريف و ثقه بالنفس كبيره أنه شريف .. طول عمره الناس بتقول صفوت الشريف فحصل له نوع من أنواع التوحد النفسانى مع أسمه لدرجه أنه بقى يظن أن الشريف هنا صفه و ليست أسم , فطلع قبل الثوره ما تنجح يقول : أحنا معندناش بطحه على راسنا .. ده طبعاً قبل ما يثبت ان الشريف هنا أسم مش صفه عشان هو حرامى كبير .. كل الكلام اللى فات ده كان مجرد مقدمه بس قبل ما أقول البحث العلمى اللى أنا ألفته و اللى هينشر فى مجله علميه عالميه مشهوره بردك .. أن هتلاقى كل اللى أسمهم تامر مثلاً لديهم نفس الشخصيه, و ده سببه أنه أتربى و كل الناس بتقوله يا تامر فطبيعى يجيله شعور أنه سيس و مش راجل ملو هدومه .. فبيبقى من الداخل حساس عاطفياً و رهيف وقلبه قلب خسايه , أنما من بره بيحاول يعمل فيها راجل بأستمرار فتلاقيه فاتح زراير القميص و يظهر شعر صدره عشان يعمل فيها راجل, زى تامر حسنى كده .. أو تلاقيه عامل فيها بطل قومى بيدافع عن مصر ضد منظمات إيران وحزب الله و حماس والأخوان وإسرائيل وأمريكا اللى كانت متواجده فى ميدان التحرير, زى تامر أمين كده .. أو تلاقيه عامل فيها ثورجى وشارك فى الثوره ونزل ميدان التحرير وفجأه أكتشف أنهم بيتكلموا أنجليش لانجويتش كويسه أوى فعرف أنهم خونه وعملاء فطلع على التلفزيون المصرى يفضحهم, زى تامر بتاع غمره كده .. طب ده بالنسبه للغلاف الخارجى للكائنات التى تسمى بأسم تامر, بالنسبه للمضمون الداخلى زى ما قولت قبل كده هما رهيفين جداً من الداخل .. فتلاقى تامر حسنى لما راح التحرير و العيال الكخه الوحشين ضربوه على قفاه و نتفو شعر صدره قعد يعيط و يولول زى الحريم, و شعوره كتامر ظهر حقيقى فى قلب الكاميرا .. و تامر أمين لما أنطرد من برنامج مصر النهارده -رغم انه بيقول انه ماشى بقراره والقيادات متمسكه بيه- طلع على الشاشه بيعيط برده .. يادى النيله .. هو مكتوب علينا عياط من الكائنات التموريه دى .. بجد كفايه قطعتم قلبنا بقى .. ده غير طبعاً بكاء المدعو تامر بتاع غمره على التلفزيون المصرى وهو بيقول: لا لا مش هيقولوا أننا أحنا اللى عملنا فى مسر كده (مسر مش غلطه مطبعيه هو قال كده فعلاً) لا لا دول مش مسريين دول بيتكلموا أنجليش لانجويش كويس أوى و المسريين بيتكلموا أنجليش لانجويش فلاحى أوى ... بعد الأمثله دى, بزمتكم ده مش أثبات أن أسم الطفل يؤثر فى بناء شخصيته؟ و أن كل اللى اسمهم تامر زى بعض؟ مش عاوز واحد والنبى اسمه تامر يجى يقولى أنا راجل اوى وايه الهبل اللى بتقوله ده و بعدها يقعد يعيط .. تذكروا أيها التامريون أنى قلت فى بدايه بحثى العلمى هذا أن لكل قاعده شواذ .. فيأما أنتم من القاعده اللى بتقول أن اللى اسمهم تامر مش رجاله, أو أنتم شواذ من القاعده دى.. فى الحالتين شواذ يعنى .. نياهاهاهاه