يا ولاد بلدى أنا هتكلم كده بالبلدى .. ينفع بعد الثوره اللذوذه الحبوبه اللى عملناها دى , يبقى ده مستوى معرفتنا بالسياسه؟ أنتم كده على فكره هتشمتوا فينا مدير المخابرات الإسرائيليه عمر سليمان لما قال المصريين مش مستعديين للديموقراطيه .. يا جماعه أحنا وقت الثوره كنا إيد واحده و كلنا ثورجيه .. طب بعد نجاح الثوره - نجاح مبدئى - و خرجنا من جبهه النضال الثورى لجبهه النضال السياسى من أجل تحقيق مطالب الثوره كان طبيعى أننا ننقسم جماعات و حركات و أحزاب و فرق .. ده مش غريب ده الطبيعى .. كل واحد فينا عاوز يحقق مطالب الثوره و يبنى مصر الجديده عن طريق الأيدوليجيات بتاعته .. ده مش عيب بس العيب أوى بقى أن كل فريق يخون و يكفر الفريق التانى .. و عمالين تستغلوا بساطه عدد كبير من الشعب المصرى و عدم حبه للقرأه ليتأكد من العلومات الخاطئه من الصحيحه بنفسه .. لحد ما صنعتوا قاموس سياسى مصرى عند قاعده عريضه من الشارع المصرى .. قاموس من أوله لأخره غلط و مفهوش معلومه واحده صحيحه للأسف .. قاموس يتعرض لأفكار و إيدوليجيات و شخصيات بشكل متخلف و خاطئ .. أنا هنشر القاموس السياسى ده .. و يا ريت أى تعريف لمصطلح أو أسم هتقرأوه دلوقتى أعرفوا على طول أنه غلط لأن القاموس كله على بعضه غلط
الدوله المدنيه : جائت فى تعريف الشيخ السلفى شومان : يعنى أمى أنا .. ايوه أمى أنا .. تقلع الحجاب عشان مينفعش يبقى فيه فرق بين المسلمه و المسيحيه
الديموقراطيه : كل واحد يعمل اللى هو عاوزه
الليبراليه : هئ و مئ و مسخره و حق الشواذ مكفول للجميع
العلمانيه : هئ و مئ و مسخره وحق الشواذ مكفول للجميع ده غير بقى عدم الأعتراف بوجود ربنا والعياذ بالله
الشيوعيه : كفر و إلحاد
الأشتراكيه : الأبن الغير شرعى للشيوعيه .. و تأميم كل حاجه فى البلد و إعلان الحرب على إسرائيل
الأخوان المسلمين : الجناح المصرى لتنظيم القاعده .. و من أهم مبادئها فرض النقاب و قتل الكفار
السلفيين : حركه جهاديه تدعو لتفجير الكنائس و جلد الناس
المجلس العسكرى : جاء بتعريفين : التعريف الأول وهو تعريف النخبه و النشطاء السياسيين : مجلس تابع لمبارك يدرس و يخطط كيفيه الألتفاف على الثوره و إعاده مبارك بوجهه جديد .. أما التعريف الثانى وهو تعريف عامه الشعب البسطاء : ملائكه نزلت من السماء لحمايه مصر
عمرو موسى : عدو إسرائيل الأول و محبوب الجماهير و أفضل واحد يقود مصر
البرادعى : هو اللى دخل أمريكا العراق و ميعرفش حاجه عن السياسه ولا مشاكل مصر .. ده غير أنه عميل أمريكى إيرانى إسرائيلى موزامبيقى
أيمن نور : بتاع التزوير و أمريكا ده
حمدين صباحى : هيموت كده و يحارب إسرائيل عشان كده مينفعش يبقى رئيس جمهوريه
نجيب ساويرس : رجل الأعمال الشريف الوحيد
أمن الدوله : جهاز أنحل خلاص
النائب العام : شريف عفيف نظيف
أحمد شفيق : راجل محترم
جريده اليوم السابع : جريده معارضه محترمه
عمرو حمزاوى : بيفهم فى السياسه بشكل غير طبيعى بجد .. حد جميل جميل جميل
شباب أئتلاف الثوره : هما المتحدث الرسمى لشباب الثوره
0 التعليقات:
Post a Comment