فى أى نظام حكم ديكتاتورى فى العالم بيكون أهم أركانه هم: قائد جيش الديكتاتور و رئيس مخابرات الديكتاتور و رئيس وزراء الديكتاتور و رئيس بوليس الديكتاتور
وبما أن الشعب بيقول أنه عمل ثورة شعارها هو : الشعب يريد إسقاط النظام
أحب أوضح حاجه.. أن الديكتاتور قد سقط.. ولكن ماذا عن أهم أركانه؟؟
فرئيس وزرائه أحمد شفيق يترشح لرئاسه الجمهورية بكل بجاحه
رئيس مخابراته عمر سليمان حر طليق يدير الثوره المضاده بكل شراسه
رئيس مخابراته عمر سليمان حر طليق يدير الثوره المضاده بكل شراسه
قائد جيوشه المشير طنطاوى يحكم البلد بكل تواطؤ
ويا حبة عينى ركن واحد من أركان النظام اللى هو رئيس بوليسه أو وزير داخليته حبيب العادلى هو كبش فداء الليله دى كلها
يعنى تم إسقاط ركن واحد من أركان النظام وياريته سقط بالكامل.. لأ ده رأسه بس اللى سقط وباقى الشرطه يأما مش عاوزه تنزل تشتغل يأما القيادات القديمه مكمله فى مناصبها يأما أمن الدوله يتحول أسمه للأمن الوطنى مع عدم تغيير المضمون وعدم الأشراف القضائى اللى كان أحد أهم مطالب الثوار
وعشان مبعدش عن الموضوع الرئيسى لأنى جاى أتكلم عن المجلس العسكرى مش على الشرطه
وعشان برده مطولش عليكم أنا هختصر
لازم كلنا ننزل يوم 27 مايو فى كل ميادين مصر ونعود بأعدادنا المليونيه لنقول للمجلس العسكرى كفايه تباطوء وتواطوء
كفايه محاكمات عسكريه ظالمه
كفايه ضرب رصاص حى ومعامله عنيفه جداً مع المتظاهرين
ولو عاوزين وجهه نظرى أنا شايف أن الأستفتاء الجيش عمله فقط عشان يشق صفوفنا بين موافق ومعارض ويلهى الشعب فى أى تجربه جديده ولذيذه.. وبعد كده تطويل المحاكمات ووضع مبارك فى شرم مده طويله عشان الناس حماسها فى الثأر من مبارك ورجاله يقل.. وكل ما نقول مليونيه أو نقول مبارك تحصل فتنه وأنا مش مستريح بأمانة ربنا من مواضيع الفتن دى وحاسس أن وراها حد.. الموضوع مش مقتصر على الجهل.. أيوه فيه جهل بس مين بقى بيغذى الجهل ده وبيوجهه وبيحرضه فى طريق الفتنه الطائفيه؟؟
وبعدين زكريا عزمى وفتحى سرور وسوزان مبارك ياخدوا إخلاء سبيل على ذمه قضايا معينه.. والثوار يدخلوا السجون على قضايا ملفقه
لالالا .. وجهه نظرى الشخصيه بعد أذن المجلس العسكرى اللى بيلعب سياسه يبقى من حقى أنتقده.. وجهه نظرى دى بتقول ان المجلس العسكرى هو قائد الثوره المضاده
أنا هنزل يوم 27 أصرخ بأعلى صوتى .. أحترم نفسك يا مجلس يا عسكرى
0 التعليقات:
Post a Comment